'टग्गा' विकास

'शिवराळपणाने विकास होत नाही' असा टोला दादांनी हृदयसम्राटांना हाणला! शिवराळपणा आणि हृदयसम्राट!! आश्चर्य वाटले ना!! यासाठी थोडेशे खोलात जावे लागेल. हृदय सम्राट हे विविध प्रकारचे असतात. युवक-हृदय सम्राट --> हे साधारण क्रिकेटपटू, नट वगैरे असतात. तरुणी-हृदय सम्राट --> ही एक नवीन जमात आजकाल महाराष्ट्राच्या गल्ली-बोळात बोकाळली आहे. जागतिकीकरणाच्या रेट्यात flexboard हे तंत्रज्ञान आले आणि प्रत्येक गल्लीचा दादा तरुणी-हृदय सम्राट झाला. पण दादांची दृष्टी फार 'टग्गी' आहे. हे असले साधारण सम्राट त्यांना दिसत नाहीत. त्यांनी एकदम अखिल-विश्व दृष्टी घेत 'anti -सेकुलर'हृदय सम्राटांवरचं आपला रोख धरला.

आता हे वेगळे सांगायला नको की, विकास हा केवळ 'पॉवर-दादां'मुळेचं होतो. हा विचार साधारण नाही. अतिशय अभ्यास करून ही विकास-प्रणाली रचण्यात आली आहे. केवळ ह्याच विचारांमुळे गेली १० वर्ष महाराष्ट्र विकासात अग्रेसर आहे. ह्याच विकासाच्या विचारामुळे 'शिवराळ' पणा महाराष्ट्रपासून दूर आहे. म्हणूनचं आपण हे विचार समजावून घेऊयात.

ह्या विचारसरणीनुसार विकास करण्यासाठी खालील मार्ग आहेत..

१. सर्वप्रथम स्वतःचा विकास करायावास हवा.

२. लोकांच्या घरा-घरात गोड पणा वाढला पाहिजे. त्यामुळे सगळ्या साखर - कारखान्यांचा 'टग्गा' विकास करावा.

३. खूप विकासासाठी करायचा म्हणजे खूप जागा हवी. ती मिळवण्यासाठी 'आदर्श' आचरण करावे.

४. राजकारणात 'टग्गे' लोकांची भरती करायची.

५. विकास हा सर्वांगीण हवा. त्यासाठी रोज आर्थर रोड जेल मध्ये सदिच्छा भेट द्यावी. सोबत मस्त 'बिर्याणी' न्यावी.

६. विकासाच्या संकल्पना समजावून घेण्यासाठी इतिहासाचा अभ्यास हवा. म्हणून 'इतिहास' (संशोधन ना करता) 

   लिहावा.

७. प्रस्थापित इतिहासकारांच्या नावापुढचे 'साहेब' काढून आपल्या 'पॉवर' ला जोडावे.   

८. ह्या प्रत्येक इतिहासकारांचा भव्य आखाडा 'भांडारकर संस्थेत' मांडावा. याशिवाय लाल महालात स्वयंवर आयोजित    

  करून उचलण्यासाठी 'पुतळे' ठेवावेत.

     इत्यादी इत्यादी.

ह्या मार्गांचे योग्य अनुसरण केल्यास, 'विकास' निश्चित आहे.

ता. क. - प्रस्तुत अभ्यासपूर्ण लेखात 'टग्गा' ही संकल्पना खूप वेळा आली. त्यामुळे त्याची व्याख्या सांगणे आवश्यक आहे. 'टग्गेपणा' म्हणजे गांधीच्या मार्गाने प्रत्येक विरोधकाला 'स्वच्छ पुसून' टाकणे असा आम्हास वाटतो. (लेखकाला यावर अजून अभ्यास आवश्यक वाटतो)